Буулдьанан ытыы инникилээх

Күрэххэ 200-тэн тахса ытааччы кыттыыны ылла

Ааспыт нэдиэлэҕэ Дьокуускайга өрөспүүбүлүкэ кыраҕы харахтаах бэргэн ытааччылара мустан, буулдьанан уонна стендэҕэ ытыыга бастыыр иһин күөн көрүстүлэр. Ол курдук, ахсынньы 21 – 23 күннэригэр СӨ буулдьанан уонна стендэҕэ ытыыга федерациятын бэрэссэдээтэлин Кубогар өрөспүүбүлүкэтээҕи таһымнаах күрэхтэһии ыытылынна.

“АРКТИК КАПИТАЛ” генеральнай дириэктэрин сүбэһитэ, Ил Түмэн дьокутаата Владимир Черноградскай Матвей Николаевич Евсеев аатыттан кыттааччыларга эҕэрдэ тыл эттэ

Үс күн устата Дьокуускайдааҕы 5-с нүөмэрдээх оҕо спортивнай оскуолатыгар өрөспүүбүлүкэ 20-тэн тахса улууһуттан  уонна Дьокуускай куораттан барыта 206 спортсмен, ол иһигэр 46 спорт маастара, 58 маастарга хандьыдаат  кытынна. Спорт бу көрүҥүгэр сааһынан хааччахтааһын суох буолан, кыра саастаах оҕолортон саҕалаан аҕам саастаах кырдьаҕаһыгар диэри кыттар кыахтаахтар. Кылаабынайа, тулуурдаах, туруоруммут соруккун ситиһэр, дьоҕурдаах, кыраҕы харахтаах буолуоххун наада. Күрэхтэһээччилэр 16 эрчиллиигэ кииристилэр. “Азия оҕолоро” спортивнай оонньууларга кыттыахтаах оҕолор эмиэ кытыннылар.

Арассыйа таһымнаах күрэх сүрүн судьуйата Павел Поляков маастар таһымын толорбуттарга Знак туттарда

Буулдьанан уонна стендэҕэ ытыы турнирдарыгар хаһыс да сылын аан дойдутааҕы кылаастаах спорт маастара, Бүтүн Арассыыйатааҕы категориялаах судьуйа Павел Поляков кылаабынай судьуйалыыр. Күрэхтэһии иннинэ Павел Николаевичтыын көрсөн кэпсэппиппэр:

–  “Саха сиригэр куруук үрдүк таһымнаах күрэхтэһиилэр ыытыллаллар. Мин быйыл номнуо 11-с сылбын кэлэн судьуйалыыбын. Миигин манна “Байбал” диэн сахалыы аатынан ыҥыраллар. Оннооҕор сахалыы таҥастаахпын. Уопсайынан, саха норуотун ытыктыыбын уонна убаастыыбын. Эһиги кырдьаҕастаргытын, бэтэрээннэргитин, аатырбыт снайпердаргытын куруук үөһээ тутаҕыт, сыаналыыгыт. Эдэр ычаакка холобур оҥостоҕут. Бу оҕону, ыччаты иитиигэ улахан оруоллаах. Саха спортсменнара үрдүк көрдөрүүлэри ситиһэллэрин курдук, куруук эрчиллиэхтэрин, араас таһымнаах күрэхтэһиилэргэ кыттыахтарын наада. Ол эрээри көтөр айан төлөбүрэ ыарахыныттан сылтаан, киин сиргэ санаатахтаран аайы барар кыахтара суох. Онон, бырабыыталыстыба өттүттэн болҕомто уурулуннаҕына, кэлимсэ былааннары оҥорон эрэ сайыннарар кыах баар. Биирдэ-иккитэ сылдьан эрчиллии, күрэхтэргэ баран кыттыы улахан уопуту, идэтийиини аҕалбата чуолкай. СӨ буулдьанан уонна стендэҕэ ытыыга федерациятын бэрэссэдээтэлин солбуйааччы Иван Маркович Гурьев миигин куруук ыҥыран кытыннарар. Төһө кыах баарынан көмөлөһөбүн, – диэн санаатын үллэһиннэ.

СӨ буулдьанан уонна стендэҕэ ытыыга федерациятын бэрэссэдээтэлин солбуйааччы Иван Маркович Гурьев

Биһиги өрөспүүбүлүкэбитигэр спорт төрүт көрүҥнэригэр салалта өттүттэн улахан болҕомто ууруллар. Онтон атын көрүҥнэри сайыннарыы ыарахаттардаах. Арай ырааҕы көрөр дьоҕурдаах тэрийээччилэр, сатабыллаах салайааччылар быһаарыылаах күүһүнэн буолаллар. Буулдьанан уонна стендэҕэ ытыы федерациятын бэрэссэдээтэлинэн “АРКТИК КАПИТАЛ” хампаанньа салайааччыта Матвей Евсеев талыллыаҕыттан, бу көрүҥнэр сайдыы суолугар үктэнэн эрэллэр диэтэхпитинэ, арааһа алҕаһаабатым буолуо.

“АРКТИК КАПИТАЛ” хампаанньаҕа уһулуччу ытар маастардар элбэхтэр. Онтон биирдэстэрэ АХО администратора, КМС России, мастер спорта РС(Я) Наталья Андреева.

Манна туһаайан федерация бэрэссэдээтэлин солбуйааччы, Ил Түмэн дьокутаата Владимир Черноградскай: “АРКТИК КАПИТАЛ” хампаанньа социальнай эбэһээтилистибэлэрдээх. Ол курдук үгүс спортсменнар араас күрэхтэһиилэргэ баран кытталларыгар, эрчиллэллэригэр күүс-көмө буолар. Спорт сайдыытыгар үгүс болҕомтотун уурар”, – диэн эттэ. Бу соторутааҕыта Дьокуускай куоракка ыытыллыбыт мас тардыһыытыгар аан дойду III чөмпүйэнээтигэр “АРКТИК КАПИТАЛ” сүрүн партнерунан буолбута.

“АРКТИК КАПИТАЛ” хампаанньаҕа үлэлиир КМС России, мастер спорта РС(Я) Матрена Андреева уонна В.Н. Черноградскай

Үс күннээх киирсии түмүгүнэн, бастакы миэстэҕэ Хотугулуу-Илиҥҥи Федеральнай университет, иккискэ – Дьокуускай куорат, үһүскэ – “Патриот” спортивнай-патриотическай кулууп хамаандалара таҕыста. Түөрт киһи спорт маастарыгар хандьыдаат нуорматын толордо. “Бастыҥ спортсмен” аатын буулдьанан ытыыга Мичил Черкашин, оттон  стендэҕэ ытыыга Мария Егорова ыллылар.  Бастыҥ тириэньэрдэринэн буулдьанан ытыыга Аркадий Андреев, стендэҕэ – Александр Сотников,  “Бастыҥ судьуйанан” Михаил Васильев буоллулар.

Анивера АКИМОВА. «Саха Сирэ» хаһыат.