АЛМААСТААХ АНААБЫРБЫТ 90 СЫЛА

Бүгүн таба иитиитинэн утумнаахтык дьарыктанар, алмаастаах сир баайынан аатырар Анаабыр долган-эбэҥки национальнай улууһа төрүттэммитэ 90 сылын туолар үөрүүлээх үбүлүэйэ. Бу кэрдиис кэмнэр тухары улуус социальнай-экономическай сайдыытыгар өйдөрүн-санааларын, доруобуйаларын харыстаабакка үлэлээбит аҕам саастаах дьоммут үгүстэр. Олортон Анаабыры Анаабыр улууһа диэн республикаҕа дорҕоонноохтук ааттаппыт киһинэн Николай Егорвич Андросов буолар.Кини төрүт олохтоох аҕыйах ахсааннаах долганнар, эбэҥкилэр, хотугу сахалар үгэс буолбут дьарыктарын ырыынак кэмигэр сайдар кэскиллэрин тус сыаллаах Программатын ырытан оҥорбута. Улуус территориятыгар булуллубут бытархай алмааһы туһаҕа таһаарар сыаллаах  «Анаабыр алмаастара»  улуус кыттыгастаах тэрилтэни тэрийбитэ, ыччаттар промышленноска сыстан барбыттара. Билигин бу «Анаабыр алмаастара» тэрилтэ социальнай бырагырааммаларга кыттан нэһилиэнньэҕэ көмөтө үгүс. Бу икки өттүттэн  үтүө хайысхалаах ситими Аҕа баһылык Иван Семенов сатабыллаахтык салайан Анаабыр долган-эбэҥки национальнай улууһа табатын ахсаанын элбэтэн, дьон олоҕун-дьаһаҕын тупсарарга социальнай хайысхалаах бырагыраамалары ылынан, олохтоохтор инникигэ эрэллээхтэр.  

Үбүлүөйдээх үтүө күн Анаабыр олохтоохторун аатыттан уот иччитигэр, иитэн-аһатан олорор Анаабыр эбэҕэ, Үрдүк Айыыларга махтаныы ытык сиэрин-туомун ыыттылар.Салгыы улуус дьаһалтатыгар «Анаабыр: уруккута, билиҥҥитэ, инникитэ»  видеоконференцияҕа аҕа баһылык Иван Семенов салайан ыытта. СР Правительствотын уонна Баһылыгын  дьаһалтатын салайааччыта Афанасий Владимиров, СР Арктика сайдыытыгар уонна хотугу норуоттар дьыалаларыгар министиэристибэ миниистирин бастакы солбуйааччыта Сергей Неустроев, Ил Түмэн  норуот депутата Иван Андреев, Арктика уокуругар Ил Түмэн дьокутаата, «АРТИК КАПИТАЛ» сир баайын хостуур холдинг генеральнай дириэктэрэ  Матвей Евсеев, “Анаабыр алмаастара” АУО генеральнай дириэктэрэ Павел Маринычев видео сибээһинэн тахсан истиҥ эҕэрдэлэрин тиэртилэр. Дьокутаат Матвей Николаевич этиитигэр: “Алмаастаах Анаабыр улууһун кытта билсиһиим оруобуна 33 сыл буолбут эбит, инньэ аҕа табаарыспынаан  инникини өтө көрбүт Николай Егорович Андросовтыын билсэн үлэлиэхпититтэн ылата. Олохтоохтордуун бииргэ өйдөһөн үлэлээһиммит түмүгэр олох-дьаһах сыыйа тубуста, ыччат үлэлээн ботуччу хамнастаах буолла, атын хоту оройуоннардааҕар быдан үчүгэйдик олороллор. Маныаха баһылык Иван Иванович  төрүт салааны сайыннарары таһынан тэҥҥэ бырамыысыланнаска болҕомтону уурара кэскиллээх».

Конференцияҕа дакылаатчыттар бу кэрдиис кэмнэргэ улуус  социальнай-экономическай балаһыанньата, култуурнай-духуобунай баайа хайдах тэтиминэн үүнэн-сайдан кэлбитин  сиһилии кэпсээтилэр, ырыттылар. Улуус сайдыытыгар бэйэлэрин сэмэй кылааттарын киллэрбит үтүө үлэһиттэргэ 90 сыллаах үбүлүөйүнэн улуус баһылыгын бочуоттаах бэлиэтинэн  баһылык бастакы солбуйааччыта Иосиф Владимирович Васильев наҕараадалаата. Ол курдук улуус дьаһалтатын кыл. бухгалтерыгар Юлия Николаевна Токуеваҕа «Муниципальнай сулууспа туйгуна” судаарыстыбаннай бэлиэни, «Почта России» АУО Сааскылаахтааҕы  салаатын начальнигар  Анастасия Егоровна Белоусоваҕа, Социалистическай үлэ дьоруойа  Илья Константинович  Спиридонов аатынан МУП 3 №-дээх ыстаадатын табаһытыгар Никита Спиридонович Туприҥҥа, «Бөрөлөөх» КМНС родовой община баһылыгар  Аркадий Афанасьевич Акакиевка, улуустааҕы үөрэх управлениетын начальнигар Октябрина Алексеевна Черепановаҕа,  «Алмаас» культура управлениетын киэргэтэн оҥорооччу худуоһунньугар Константин Афанасьевич Андросовка үөрүүлээх быһыыга-майгыга туттартаата.  Киэһэтин бырааһынньыктааҕы салютунан түмүктэниэ.   Инникитин даҕаны үүнэ-сайда чэчирии тур, тамайар үөр табалаах, алмаастаах кыраайбыт Анаабыр!

Гуннара Байгильдина

Оставьте комментарий

Ваш e-mail не будет опубликован. Обязательные поля помечены *